अपर हटको भावी नेतृत्वमा नेपाली समुदायको प्रतिनिधित्व? रमिल अधिकारीको उम्मेदवारी

अपर हट, न्यूजील्याण्ड — नेपालबाट आप्रवासन गरी हाल अपर हट निवासी डा. रमिल अधिकारीले आगामी स्थानीय निर्वाचनमा अपर हट सिटी काउन्सिलको सदस्यका लागि उम्मेदवारी घोषणा गरेका छन्। बहुपक्षीय समुदायप्रति सेवाभावका साथ, उहाँ समावेशी, पारदर्शी र समुदायमुखी नेतृत्वको वकालत गर्दै पुनः चुनावी मैदानमा उत्रिनुभएको हो।

डा. अधिकारी स्वास्थ्य क्षेत्रमा दीर्घ अनुभव बोकेका सार्वजनिक स्वास्थ्य विज्ञ, न्यायकर्मी (Justice of the Peace), विवाह अधिकृत, र विभिन्न सामाजिक संस्थामा नेतृत्वदायी भूमिकामा सक्रिय हुनुहुन्छ। हाल उहाँ Public Health Association of New Zealand र KiwiClass को बोर्ड सदस्य हुनुहुन्छ र Wellington Branch को अध्यक्ष समेत रहनुभएको छ।

उहाँका अनुसार अपर हट विविध बन्दै गएको छ, र यस्तो अवस्थामा नगर परिषद्ले पनि त्यो विविधता झल्काउनु आवश्यक छ। उहाँ भन्नुहुन्छ, “भाषा, संस्कृति र पहुँचका कारण धेरै आप्रवासी र शरणार्थी समुदायहरू नीति निर्माणमा सहभागी हुनबाट टाढा छन्। म यस्तो वातावरण निर्माण गर्न चाहन्छु, जहाँ सबैले आफ्नो आवाज उठाउन सकून् र सुन्न पाइओस्।”

उहाँले अगाडि सारेका प्रमुख एजेन्डाहरूमा छन्:

• परिवारहरूका लागि पहुँचयोग्य बेलुकापछिको स्वास्थ्य सेवा
• न्यून दरका कर (rates)
• विविधता र समावेशीताको प्रत्याभूति
• हरियाली संरक्षण र वातावरणीय संरक्षण
• पारदर्शी र दयालु नेतृत्व
• स्थानीय व्यवसाय प्रवर्द्धन र स्मार्ट आर्थिक विकास

नेपालमा एमबिबिएस अध्ययन गरी न्यूजील्याण्डमा DPH र MPH पूरा गरेका डा. अधिकारी हाल PhD का विद्यार्थी समेत हुनुहुन्छ। उहाँ दुई छोराछोरीका पिता हुनुहुन्छ र उहाँको परिवार पनि यही अपर हटमै स्थायी रूपमा बसोबास गर्दै आएको छ।

“सामूहिक प्रयासबाट मात्र समाज समृद्ध हुन्छ” भन्ने विश्वासका साथ डा. रमिल अधिकारी सबै समुदायका प्रतिनिधित्वका लागि अघि बढ्नुभएको छ।